చినుకులు పడుతుంటే చిరాకేల? తడవవోయ్
పదుగురు తోడుంటే పరాకేల? నడవవోయ్
ప్రతి నిమిషం నీలోనే తుళ్ళిపడే తపనుంటే
మోయలేని బరువులు మనసుకేల? విడువవోయ్
వెలలేని చెలిమి సిరులు నీకోసం వేచుంటే
రెప్పచాటు చెమ్మలు కనులకేల? తుడవవోయ్
నిప్పులాంటి సంకల్పం నిజమై వెలగాలంటే
నీరసం, నిస్తేజం తనువుకేల? వదలవోయ్
గజలు గాలి సిరాశ్రీ! నిను తాకిందంటే
కాగితాల లెక్కంతో కలముకేల? కదపవోయ్