B

భ్రమరాలను చూడననే పూలతోట ఏమిటో! సుమగంధం మోయననే గాలి ఆట ఏమిటో!! గమ్యమిదని చెప్పలేక బాట మూగబోయినా గమనం గమ్యం చేసే పక్షిపాట ఏమిటో!! నినుమరిచానని చెప్పు నోటిమాట నిజమైతే నిన్ను మరువలేనను కన్నీటి వూట ఏమిటో!! ఎదురైనను చూడనట్లు తప్పించుకు తిరిగేవు నలుగురిలో ననువెతికే చూపు వేట ఏమిటో!! రగులు జ్వాల నీటివల్ల ఆరిపోతుంది గాని కన్నుల్లో అశ్రుకణం పెట్టు మంట ఏమిటో!! కొంటెగాలి దురుసుతనం గాలిపటం కంటెనా ఆధారపు దారం తెగ పెనుగులాట ఏమిటో!!